عبادات - حج وعمرہ

India

سوال # 175132

حج کی کتنی قسیمیں ہیں ، وضاحت فرمائیں۔

Published on: Jan 12, 2020

جواب # 175132

بسم الله الرحمن الرحيم


Fatwa : 430-335/B=05/1441



حج کی تین قسمیں ہیں:



(۱) حج قِرآن۔ اس میں عمرہ اور حج دونوں کا احرام میقات سے ہی ساتھ باندھا جاتا ہے اور عمرہ اور حج کے تمام مناسک کی ادائیگی کے بعد احرام کھولا جاتا ہے۔ اس میں مشقت زیادہ ہے اس میں بعض دفعہ بہت دنوں تک احرام کی حالت میں رہنا پڑتا ہے اوراحرام کے ممنوعات سے بچنا پڑتا ہے۔ اس پر قربانی بھی واجب ہوگی۔



(۲) حج تمتع۔ اس میں حاجی میقات سے صرف عمرہ کا احرام باندھ کر جاتا ہے، مکہ پہونچتے ہی پہلے عمرہ کرتا ہے یعنی طواف اور صفا مروہ کی سعی کرتا ہے اس کے بعد بال کٹواکر احرام سے نکل جاتا ہے اور سلے ہوئے کپڑے پہن لیتا ہے پھر ۸/ویں ذی الحجہ کو حدود حرم سے حج کا احرام باندھتا ہے اور حج کے تمام مناسک ادا کرتا ہے پھر دسویں کو قربانی کرکے احرام سے نکلتا ہے۔ اس میں بڑی سہولت ہے۔



(۳) حج افراد۔ اس میں حاجی میقات سے صرف حج کا احرام باندھتا ہے اور حج کرنے کے بعد احرام سے نکلتا ہے۔ اس کے اوپر قربانی واجب نہیں۔



واللہ تعالیٰ اعلم


دارالافتاء،
دارالعلوم دیوبند

اس موضوع سے متعلق دیگر سوالات